Мы бярэмся за тыя кнігі, у якія ў нас ёсьць вера і сілы. Нам цікавая перадусім навуковая і навукова-папулярная літаратура, кнігі пра мастацтва, проза, паэзія і драматургія. Ёсьць некалькі кірункаў, дзе мы маем экспэртызу: перадусім, усё, што мае дачыненьне да стваральнай дзейнасьці беларускай эміграцыі; квір- і фэмінісцкае пісьмо; франкафоніка; багаслоўе, гісторыя, мовазнаўства. Але мы заўсёды радыя пашыраць нашыя гарызонты.
Ёсьць багата цудоўных твораў і цэлыя жанры, якія па-за абшарам нашай экспэртызы. Напрыклад, дзіцячая літаратура. Іншыя выдавецтвы ў такіх выпадках зробяць лепшую за нас працу. Мы падкажам вам варыянты, калі гэта неабходна.
Мы выдаем кнігі па-беларуску і падтрымліваем жывой традыцыю клясычнага правапісу, бо верым, што абмеркаваньне правапіснага дуалізму ў беларускай мове павінна адбыцца ў свабоднай Беларусі з улікам напрацовак эміграцыі. Мы карыстаемся дзяржаўным правапісам таксама.
Skaryna Press знаходзіцца ў Вялікабрытаніі — далёка ад Беларусі і большасьці краінаў, дзе нашыя суродзічы цяпер жывуць у значнай колькасьці. Гэта стварае лягістычныя складанасьці, таму мы робім і распаўсюджваем кнігі крыху інакш, напр. часта карыстаемся друкам на запыт. Гэта можа выдатна пасаваць адным аўтар-к-ам, і зусім не — іншым.
Калі вы думаеце, што мы — правільнае для вас выдавецтва, то напішыце нам. Дашліце рукапіс ці фрагмэнты, і ўсё, што дапамагло б нам атрымаць добрае ўяўленьне пра задуманую кнігу. Зьвяртайцеся таксама да сябраў рэдкалегіі і падыходзьце да нас пазнаёміцца на імпрэзах.
Фінансаваньне кніг — частае пытаньне, якое нам даводзіцца абмяркоўваць з аўтар-к-амі. Ва ўмовах эміграцыі выдаваць і распаўсюджваць кнігі складана і дорага. У большасьці выпадкаў патрабуюцца датацыі або інвэстыцыі ў той ці іншай ступені. Для гэтага мы пасьпяхова праводзілі краўдфандынг самастойна і ў партнэрстве з плятформай Gronka, атрымлівалі гранты, знаходзілі ахвотных цалкам або часткова падтрымаць кнігі.
Выхад кнігі — гэта толькі пачатак ейнага жыцьця. Вельмі часта ейны посьпех залежыць ад аўтаркі, ейнай уключанасьці ў працэсы, здольнасьці працаваць з аўдыторыяй, у сацыяльных сетках, гатоўнасьцю падарожнічаць, размаўляць зь людзьмі і атрымліваць ад гэтага задавальненьне. Мы вельмі любім працаваць аўтараў, якія любяць працаваць з сваімі кнігамі.